Evala Olivere!
Odma u počelu da budemo načisto: ako iko ni umri, onda ti nis umri! Ako je iko bi prorok u svojen selu i svojen zavičaju, onda si to bi ti… To smo rišili! Jošćec i ovo: ne pada mi na pamet pisat ti kakov nekrolog, nikakov "in memoriam", slobodi Bože "govor" za nada grebon… Grubo je reterat se i od patetike, tužan je ovo skodnji dnev, moj galebe… Naročito kad se dogodi onako, navrime izjutra, na tašće…
E, pasalo je pet dugaških godišćih, moj Olivere, olkako si parti.
Je, ne želin ti napisat ovode ni sve ono ča san ti zaboravi reć kad smo se intravali u kali doklen smo 11 ipo godin bili susidi u Slavićevon u Splitu. Najdražje od svega bilo mi je naše: pobratimstvo u bodulstvu…! Ja Bračanin, ti Korčulanin… To je ona ćutilnost kakova se doživi kad se dva naša čejadina intradu u Antofogasti oli u Nevi Jorku, u Vankuveru oli na Novon Zelandi… Ja san bi mali škojić u Splitu, a ti kontinenat u ten isten velen mistu poda Merjanon, pa mi je bilo puno drago doć ti blizu i osvitlit se su bokun tvojega svitla, tvoje luminažitadi. Ko Misec, kal mu Sunac dã kuraja… pa on svitli obnoć.
Zaradi svega ti i vu leteru zdatajen u jaziku domaćen, čakavsken jaziku, kako bi sputi selaške moje beside sa niman luškiman tvojiman: neka se i tako vežedu Brač i Korčula skupa, ma i obadva škoja za istu kolonu, kolonu ol Dalmacije…
Kolikogod putih da bi ti to bi spomenu, normalno da se ti nis moga sitit svih onih naših deškorših u Supetru, kad si u prvin godišćiman 80-ih lanjskega i vika i milenija kuštava na moj Brač, nastupajuć po cilon Dalmaciji s kuverte broda "Calypso"… To su bile večeri! Ja mislin, digod i po dva puta u jedno lito…
Na Velen mostu u Supetru tvoj je trabakul (valjda je ono bi trabakul, ne spominjen se tašno?), bi spućen konopiman, ciman i barbitan, i jedva smo čekali da ti počmeš poskakivat uza pisme ča smo jih svi već znali napamet. Pa i one ča su koji dan prin prvi put bile izvedene priko bare, na Prokurativi u Splitu, na Spli‘sken festivalu. Normalno, govorin ti, nis se moga spominjat tih naših susretih, ali ja ih pantin i čuvan sve one tvoje autograme ča si mi jih tih godin pisa. Uglavnon je to bilo: "Siniši od Olivera"… A, spominjen se, nikomu nis baš onako tek-tako potpisiva svoje slike, oli meća potpis na komad karte: vavik si pita nega koji ti se je obraća: "Kako se zoveš?" I napisa biš njegovo ime…
Barenko pet-šest godišćih zaredon, prin njih 40, družili smo se u Supetru i vavik bi te jedva dočeka vidit i zagrlit. I ne samo ja… Bila je su menon i mati moja Nikolina, i ona te je obožavala. Ne spominješ se, ali skupa smo se grlili i veselili… Poslin tri-četiri godine, već si nas i raspoznava, spominjen se, ni to bilo teško razaznat…
I ondac su prošle puste godine…
Tako da kad smo se prvi put intrali, ko susidi, u Slavićevon u Splitu, ja san ti priša i reka otprilike:
"Skužaj, šjor Oli, nemoj se jidit, ali ne mogu ti govorit VI, ti si opće misto vega puka i Dalmacije općenito, i ako ti buden persirat ćutit ću se koda želin jemat distancu su tebon."
Nasmija si se ne samo sa justiman, vengo i so nin tvojin teplin jočiman, dobriman jočiman ko u malega diteta, i promuklo si mi ništo dobrodušno bi odgovori tipa:
"Ajde, ne zajebaji!"
Kapa sa frontinon vavik ti je bila na glavi, doklen si se sporin koraciman skalava prama Rivi najprvo iz Slavićeve, pa kroza Kačićevu do Pijace, i ondac Šubićevon priko Voćnega trga… Šilterica koda je bila zadnja brana ki tvojon anonimnosti, ali, moj lipi anđele, kako si ti moga učinit po metra – anonimno? Nema tega ni frontina ni sombrera koji bi te sakri, koji bi te izdvoji, osami oli retera od tvojega puka. I sad vidin kako bidu se judi nasmijali kad bidu prošli i pripoznali te, kako nin je bilo drago ča su te sreli i uživo vidili… Nema ga, ja mislin, koji se je rodi, a kojega bi Dalmatinci višje volili vengo tebe, moj galebe. I ne samo Dalmatinci…
I zato cila Dalmacija plače za tebon! Ne brez razloga. Tobože je umri najveći Dalmatinac koji je po njon hodi u zadnjih… neću napisat koliko. Kad bi Dalmacija prominila ime, prominila bi ga u – Oliver! I, ne triba nas bit sram suzu pustit, zaplakat… Parti je najveći među nama, parti je, ma parti je tako da je osta. Ko rika… I rika stalno prolazi, odlazi, gre ća… ma ostaje… Nikad ni prišušila. I ti si, ka, tobože iša ća, moj lipi anđele… Malo morgen, morski vuče! Neće proć dnev, a da te nećemo čut. Puno je tega iza tebe ostalo; ustvari, puno tega si ti učini, a da te se ne bismo vavik sićali.
Da, ne prolazi dnev, a da te ne čujemo…
Moran ti i ovo reć: vavik si jema dobar osjećaj za udrit ritam pozitivne dramaturgije u tustu i pustu našu dalmatinsku svakodnevicu. Bila je to svaka tvoja nova pisma, ča bi se izdvajala iz svega onega ča smo morali slušat, mimo svoje voje… I kad si bi parti, bi si udri važan timbar dalmatinskega i svehrvatskega živjenja: parti si kad je cila nacija suzan orošena srićon zaradi slebra u balunu ča smo ga bili osvojili u Rusiji. Ton radosnon strani medaje, onon alegriji, ti si Olivere bi dâ i drugu bandu medaje, onu tužnu… I jopeta si uspostavi balancu emocije u Dalmaciji… I ne samo u Dalmaciji. Svi smo i pivali i plakali.
Spomenu san ti mati moju Nikolinu, spominješ se? E, i tote si uspi uspostavit ravnotežu – ovo je sadar osobno, ali neka je, za uspomenu na sve naše susrete – jerbo si ti parti na 29. sedmega, a njon bi sutra bi 70. rojeni dan na 30. sedmega, da je ni Bog bi pozva među anđele jošćec prin puna 21 godišća… Ovako, pensan i virujen da ćete se lipo inkontrat, ti ćeš pivat, Fiamengo će pisat, Zdenko će konponirat, a mati moja će balat i pleskat… onako kako svih vih godišćih cila Dalmacija i piva i plešće, i bala i plače… Ni sram kad čoviku dojde zaplakat… Te suze, ta voda, slana voda iz očijuh, to je jedino ča nas jude razlikuje od svih drugih ča jesu, ča živedu i dišedu, ča jidu i pijedu, ča se veselidu i umiredu…
Zajni put inkontrali smo se na Pjaci ol Šinjorih u Splitu. Reka san ti:
„Prijateju, želin ti da ča prin ozdraviš, da se okrpesiš!“
„Fala ti. Tribat će puno sriće“ – odgovori si mi.
Koja je prava banda na medaji ol sriće, to možda nikad nećemo znat. Neka ti se dobri Bog smiluje i neka ti dã vikovišnji pokoj. A tvojon fameji, kako su stari Dalmatinci govorili: „Neka se Bog dã radovat!“
Dobro ti bilo more, moj lipi anđele… Dobra ti noć, kumpanjo… I, pozdrav mi mati moju Nikolinu, moj galebe…
Tvoj Sini.